Vér morðingjar

Í viðleitni minni til að elda mér góðan mat, fjárfesti ég í steinselju í potti.  Það væri í sjálfu sér ekki í frásögu færandi nema hvað að þessari ágætu steinselju fylgdu ógrynni af pínulitlum flugum sem hafa undanfarna daga gert mér lífið leitt.  Frábæra hugmyndin um ferskar kryddjurtir í stofuglugganum er skyndilega ekki lengur svo frábær og í staðin eru framin hér fjöldamorð á hverjum degi.  Ég sem venjulega forðast pöddur eins og heitan eldinn er orðin svo harðsvíruð að ég krem kvikindin með berum höndum án þess að blikna.  Það versta er þó að ekki virðist sjá högg á vatni og pöddusamfélagið virðist eiga endalausa uppsprettu af sjálfsmorðsárásarliðum sem gera atlögu hvenær sem tækifæri gefst.  Ég er því algerlega búin að fá yfir mig nóg á þessu afkastaleysi mínu við morðin og lýsi eftir árangursríkari aðferðum til gjöreyðingar pöddusamfélagsins.  Það er alveg ljóst að þetta heimili hefur hug á að koma sér upp gjöreyðingarvopnum.

Yfir og út í bili

GEH

Athugasemdir

[Kolla Kolbeinsdottir (IP-tala skráð) 10.3.2009 kl. 01:35]

Suss!!  Heyrðu einhversstaðar las ég að það gæti hjálpað að renna vel heitu vatni í gegnum pottinn, en ég sel það ráð nú ekki dýrara en ég keypti það...   en í versta falli á verður steinseljan bara "pre cooked"

[Sigga frænka (IP-tala skráð) 11.3.2009 kl. 09:06]

Hentu steinseljukvikindinu og pottinum !!!! Hvað meinarðu með hljómsveitarleg nöfn!?? á strákunum okkar ? það er þá ágæt skýring á því ...allir eru þeir heimsfrægir á Íslandi. Hlakka til að fá þig í heimsókn á vordögum...vorið er alveg að springa út hér.

[Elin Færeyingur (IP-tala skráð) 17.3.2009 kl. 14:13]

Ég myndi nú fóðra ruslatunnuna með steinseljuplöntunni og þar með kvikindunum sem henni fylgja. Og svo myndi ég kaupa spray og drepa restina þannig! Gangi þér vel í baráttunni!