Af ritvellinum

Málfarsfasistinn sér sig knúin til að svara Siggu frænku opinberlega því málfarsfasistinn viðurkennir fúslega að hann hefur aldrei verið sterkur á svellinu í réttritun og stafsetningu.  Hluti af vandamálinu er að málfarsfasistinn talar norðlensku og setur til að mynda oft heldur mörg -n- í orð eins og vanta og henta.  Mér sýnist nú reyndar að villurnar í síðustu færslu séu mest megnið fljótfærnisvillur í innslætti sem er mjög algengt að komi fyrir hjá málfarsfasistanum enda hafa fingurnir oft ekki undan að slá inn það sem fasistinn hugsar  þegar andagiftin kemur yfir hann.  Engu að síður verða þetta að teljast slæleg vinnubrögð hjá málfarsfasistanum og óafsakanleg þar sem málfarsfasistinn er þekktur fyrir að refsa nemendum sínum grimmilega fyrir slæleg vinnubrögð.  Því sér málfarsfastistinn sig knúinn til að biðjast opinberlega afsökunar á þessum tæknilegu mistökum.  Það ku koma fyrir besta fólk að láta hanka sig á þeim. 

Það er því ljóst að fasistinn verður að venja sig á að nota púkann að staðaldri eða gera eins og margir mætir menn hafa gert á undan honum, það er að skrifa eins og honum sýnist og kalla það ritstíl.  Málfarsfastistinn hefur reyndar fyrirmyndir að því þar sem einn af hans leiðbeinendum notar slíkan einkaritstíl óspart og harðneitar að skrifa ypsílon.

Yfir og út á þriðjudegi

Athugasemdir

[ammaG (IP-tala skráð) 9.10.2007 kl. 16:06]

Leiðbeinandi eða ekki, ja svei. Einkaritstíll er bara orð yfir þá sem ekki nenna að hugsa eða hafa nennt að læra það sem þeir áttu að læra í barnaskóla. og hananú. Það eina sem er afsakanlegt eru innsláttarvillur og þó, maður á að lesa yfir textann áður en hann er sendur. Blessi þig fasisti minn. aG

[Sigga frænka (IP-tala skráð) 9.10.2007 kl. 22:44]

Hin opinbera afsökunarbeiðni er hér með tekin til greina enda sagði ég INNSLÁTTARVILLUR  en ekki stafsetningarvillur. Ég tala nú norðlensku líka en tel mig þó skrifa nokkuð rétt. Stend mig þó að því að muna ekki alltaf hvaða orð er best að nota ....þá er norskan að þvælast aðeins fyrir mér.

Tek heilshugar undir með ömmu þinni varðandi svokallaðan einkaritstíl!! Það er bara málfarsleti eða ritleti.... ef þau orð eru til í íslenskri tungu. Nákvæmlega eins og eikka, gegt, o.s.frv.