Atvinnuklappstýra

Við Þorbjörg fórum í reiðtúr í dag.  Sá reiðtúr var nú farin meira af prinsippástæðum en löngun til útreiða.  Skítakuldi, norðangarri og úrkoma sem eiginlega flokkaðist sem hagl.  Mikið rosalega er vont að fá svona hagl í augað, eitt augnablik varð ég algerlega blind og hefði hún Litla-Jörp viljað, hefði hún líklega auðveldlega getað notað tækifærið og losnað við mig því það tekur smá tíma að ná jafnvægi aftur þegar maður sér ekki neitt og nístandi sársauki sker í gegnum höfuðið (smá dramatík hérnamegin).  En hún Litla Jörp mín trítlaði áfram algerlega ómeðvituð um ástand knapans sem bölvaði hraustlega en náði fljótt jafnvæginu aftur og stuttu seinna hluta af sjón. 

Allar (ég, Jörp, Þorbjörg og Bleik) komumst við þó heim enda vindurinn í bakið seinasta hlutann.  En það leið langur tími þar til ég náði fullri sjón og hreyfigetu í andlitsvöðvana. 

Nú svo ég snúi mér að öðru, þá er ég að hugsa um að gefa starfsferil sem nautgriparæktarráðunautur upp á bátinn og gerast þess í stað atvinnuklappsýra.  Þessa hugmynd fékk ég frá kínverskum ritstjóra tímarits sem lagði starfið á hilluna en æfir nú klappstjórnun af kappi í þeirri von að komast í klapplið Ólympíuleikana. 

Og í framhaldi af því langar mig að fá að vita af hverju það var talin góð hugmynd að Kínverjar héldu Ólympíuleika.

Yfir og út af eyrinni

GEH

Skattabarnið frh.

Já blessað barnið, hafði bæði nafn og fæðingardag en ég reyndar steingleymdi á sínum tíma að spyrja hver væri faðir barnsins, því ekki hafði ég sjálf hugmynd um það frekar en annað er viðkom þessu barni.  Áðurnefndar barnabætur hafði ég hins vegar aldrei séð þó ég hefði nú mun meiri áhuga á þeim en sjálfu barninu.  Þetta var því algert ripp-off, þar sem ég sat uppi með ófeðrað barn og átti að borga skatt af barnabótum sem ég hafði aldrei fengið.

kv.

GEH

Skattabarnið

Ég er þekkt fyrir að vera ekki mikið fyrir börn- nema bara svona í góðu hófi.  Í tilefni þess að nú líður að hinum árlegu skattskilum datt mér í hug barnið sem skatturinn gaf mér hérna um árið.   Þetta barn kom sem sagt fram á skattframtalinu mínu 2003 og hefði líklega verið þar eitthvað áfram því sá sem sá um skattframtalið mitt í þá dag, hafði litla hugmynd um fjölskylduaðstæður mína en fór fyrir tilviljun að tala um barnabæturnar sem ég hafið fengið.  Það kom mér ákaflega spánskt fyrir sjónir þar sem ég kannaðist ekki við að eiga neitt barn og frábað algerlega að taka við þessu þó ég efaðist í sjálfu sér ekkert um ágæti barnsins.  Ég vona bara að barnið hafi fundið stað á skattframtali einhvers sem vildi taka við því og barnabótunum svo það ráfi ekki enn þann dag í dag munaðarlaust í húsnæði Ríkisskattstjóra.

Yfir og út úr Eyjafirðinum

GEH

Hvernig bjór ert þú?

Það er búið að vera gott veður í heila viku.  Stillt og bjart veður, frábært.  Átti leið í Kjósina í gær í glaða sólskini og logni.  Hef nokkrum sinnum komið þangað og verð alltaf jafn hrifin.  Þetta er án efa einn fallegasti staður á Íslandi

Annars hefur lífið verið rólegheit síðustu daga, það er að segja, nóg að gera en engin stórátök.  Svo styttist í páskana.

Datt inn á síðuna blogthings.com í gærkveldi.  Þar má taka hin líklegustu og ólíklegustu próf.  T.d  Hvernig bjór ert þú? 

Ég ku vera Guinness

Ég drekk ekki Guinness

hmmmmm

Þó ég bloggi nú ekki oft um fréttir þá held ég að ég láti þetta flakka.  Hef áður lýst því yfir að ég skilji ekki þetta Bítlafár og finnst t.d. miklu meira til Stones koma heldur en Bítla-gutlsins.  Endurtek enn og aftur að líklega er Bítlaæðið einn af þessum "atburðum" þar sem maður varð sjálfur að upplifa til að meta.  En það sem ég vildi sagt hafa var.  Ég er ekki dauðhissa yfir litlum viðbrögðum landans.

Góða helgi

Íslendingar fúlsa við meistaraverki

Sjálfstæðismál

Hendi inn hérna smá færslu.  Er á leið í hesthúsin, hvílík dásemd að vera búin að fá þær stöllur Litlu-Jörp og Bleik.  Litla-Jörp er öll að koma til, verður sprækari með hverjum deginum og við bætum alltaf aðeins í töltvegalengdina á hverjum degi.  Erum reyndar að vinna okkur úr smávægilegum issjúum með að fara frá hesthúsinu á undan Bleik.  Eins og með Grána forðum daga þá má hún Litla-Jörp ekki af Bleik sjá, og lifir í stöðugum ótta um að verða skilin ein eftir.  Ég þarf eitthvað aðeins að vinna í sjálfstæðismálunum á þeim bænum. 

Og eins og með Grána forðum daga þá er það Bleik sem er leiðtoginn í þeirra sambandi.  Bleik kann þó mun betur að fara með vald sitt en Gráni gerði og því ríkir að mestu friður og ró í stíunni. 

Yfir og út úr frábæru útreiðaveðri á Eyrinni

GEH 

 

 

Reykjavíkurfrí

Þýðir, á þessum bænum, ekki frí í Reykjavík heldur frí frá Reykjavík.  Það frí mun endast þangað til eftir páska. 

Hér er allt annars meinhægt, meira að segja veðrið.  Og það styttist í páskana.  Jamm, þetta er svona heldur á uppleið því vorið er handan við hornið. 

Kv. af eyrinni

GEH

Þau stórmerku tíðindi.....

......hafa gerst að ég hef nú í morgun unnið að mínu ágæta doktorsverkefni.  Er svo stolt af því afreki að mér þótti ástæða til að deila því með ykkur hinum.  Húrra fyrir því.  Annað var það ekki að þessu sinni

kveðja

GEH

Sveita "stúlkunar" draumur

Þetta var nokkuð massív vika, mánudag til fimmtudag stóð Búnaðarþing yfir og í gær föstudag var nautgriparæktarfundur í Þingborg.  Þegar ég skreið inn úr dyrunum heima hjá mér klukkan hálf átta í gærkveldi leið mér eins og ég hefði verið á stöðugu ferðalagi síðan á mánudagsmorgun og að sá mánudagsmorgun hefði að minnsta kosti verið fyrir hálfum mánuði síðar.  Að sjálfsögðu hjálpaði veðurfarið ekki til við öll þessi ferðalög og það skal segjast alveg eins og er að þær Litla-Jörp og Bleik hafa verið nokkuð afskiptar, af minni hálfu, þessa viku.  En þær virtust nú vera sæmilega hressar með að þegar ég leit til þeirra í gærkveldi.  En nú er friðurinn úti og stefnt á reiðtúr í dag, það er meira að segja sæmilegt veður, aldrei þessu vant. 

Nú veit ég að ákveðin vinkona mín hérna á staðnum hugsar sitt því ég er enn og aftur að hallmæla veðrinu á Hvanneyri .  Verð samt að gera það reglulega bara til að fá útrás fyrir þessar frústarasjónir. 

Ég fékk hræðilega martröð í nótt, mig dreymdi að það væri há-sauðburður en ég hafði, sökum vinnu, ekki nokkurn einasta tíma til að komast í fjárhúsin  sama hvað ég reyndi.  Er öll þessi vinna farin að leggjast á sálina á mér??????????  Maður spyr sig.  Ég er því nú þegar farin að hugsa fyrir sauðburði, enda algerlega nauðsynlegt fyrir geðheilsuna að ná honum. 

Set af því tilefni hér myndir af einu af björgunarafrekum fyrri sauðburða.  Litla þrílembingnum henni Spertu sem eitthvað hafði orðið undir í lífsbaráttunni í móðurkviði. 

 Nýfædd og frekar líflítil   

  Komin á hitapokann, undir ofninn.

 Heldur er nú upplitið að batna

  Fyrstu skrefin í heiminum geta verið erfið

  En þetta lærist þó fljótt

 Og svo var ekki verra að fá nýja mömmu og STÓRA bróður

Yfir og út úr sauðburðarhugleiðingum á eyrinni

Sveitavargurinn

 

ZZZZZZZZZZZZZZZZ

Ég punkteraði algerlega þegar ég kom heim úr vinnunni.  Vildi ekkert fremur en að það væri föstudagur í dag og þar með væri ég minn eigin herra á morgun, því er þó ekki að heilsa.  Þarf að þrauka einn dag enn, og reyndar nokkra klukkutíma til viðbótar áður en ég fer að sofa í kvöld.

Yfir og út af eyrinni

GEH