og enn um Dani

Mér verður tíðrætt um Dani hérna, ég var nefnilega að lesa að Danir hafa beðið Íra afsökunar á ránum og gripdeildum á víkingaöld.  Hvaða hel#$&%$ aumingjaskapur er nú það, alveg týpískt fyrir Dani.  Þeir hafa sjálfsagt diskuterað þetta grundigt, sett nefnd í málið og komist að þeirri niðurstöðu að þetta lægi mjög á sálinni hjá Írum.  Ég hef nú reyndar alltaf haft þá tilfinningu að Írar séu mjög til muna hressari og glaðlegri en Danir. 

Ég man annars ekki til að hafa heyrt af því að þeir hafi beðið Íslendinga afsökunar á því að hafa stolið öllu steini léttara hér í gengnum aldirnar, svo forljótir danski kóngar gætu farið í stríð og lifað í vellystingum praktuglega, á meðan landinn drapst úr eymd og hor.  Þeim væri nær að biðjast afsökunar á því.  Ég lýsi hér með eftir afsökunarbeiðni, frá Dönum, til handa íslensku þjóðinni

Jagger og Tina

Í dag eru víst 30 ár síðan Elvis dó og það ku vera haldið upp á það víða, sennilega einnig af því fólki sem heldur því fram að Elvis hafi ekki dáið. 

Ég hef aldrei skilið þetta með Elvis.  Jú jú hann á svo sem nokkur ágæt lög sem maður raular með þegar þau eru spiluð í útvarpinu.  Þetta er alveg eins með Bítlana.  Hef aldrei náð upp í þetta Bítlaæði, öskrandi múginn og grátandi konur sem falla í yfirlið.  Líklega er þetta eins og svo margt annað "you had to be there" 

Ég er hins vegar hrifin af Stones.  Þeir eru líka enn að og láta ekki deigan síga.  Við vitum öll hvernig fór fyrir Elvis, já og Bítlunum.  Þess vegna finnst mér Jagger og félagar mun merkilegri en bæði Elvis og Bítlarnir til samans.  Svo má heldur ekki gleyma henni Tinu Turner en hana telur nú engin með enda "bara" kona. 

Ég er fyrir löngu búin að ákveðja að þegar ég verð sextug ætla ég að hafa fótleggi eins og Tina og vera jafn svöl og Jagger, ég stefni nefnilega að því að vera enn að um sextugt og gott betur

Yfir og út í bili

GEH

stand by your man

Ég verð nú eiginlega að svara henni Siggu frænku opinberlega.  Ég held nefnilega að "vandamálið" ef vandamál skyldi kalla sé það að ég hitti Dani í Danmörku.  Þeir Danir sem hún kynntist voru fólk sem, líklega af ævintýraþrá, hafði drifið sig úr landi.  Ég kynntist hins vega þá aðallega þeim sem sátu eftir.  Það sama á sennilega við hjá Siggu í Noregi. 

Nú og þar sem ég veit að Sigga er haldin sömu ævintýraþránni og ég sjálf þá á líklega best við okkur að kynnast fólki sem er á svipaðir línu og það er nú líklegra að finna það fólk í hópi þeirra sem eru þá líka "útlendingar" í viðkomandi samfélagi.

Annars er ég núna að hlusta á "stand by your man" á finnsku í útvarpinu, hljómar eiginlega einkennilega sannfærandi.

yfir og út

GEH

íhaldsemi dansksins

Aldrei náði ég neinum almennilegum kontakt við Dani í þau tvö og hálft ár sem ég bjó þar.  Fannst þeir alltaf svo óskaplega ferkantaðir eitthvað og þótt ótrúlegt megi virðast algerlega húmorslausir.  Mér samdi alltént mun betur við flesta aðra en Dani, þó mér hafi kannski ekki samið neitt sérstaklega illa við þá.  Við bara áttum ekki samleið.  Ég gat bara ekki skilið þessa áráttu þeirra til að skipuleggja alla mögulega og ómögulega hluti langt fram í tíman, held bara að það hljóti að vera óskaplega leiðinlegt líf að lifa. 

Ástæðan fyrir þvi að Danir vilja ekki hætta að reykja er því einfaldlega íhaldssemi,  þeir geta ekki breytt því sem einu sinni er komið inn á skipulagið og því mun taka þá a.m.k heila kynslóð að breyta þessu, ef þeir lifa þá það

GEH

Reykingabann hunsað

haust

Mig hrjáir bloggleti.  Líklega vegna þess að ég er svona heldur rislítil almennt þessa dagana. Náði mér í einhverja aðkenningu að kvefi með tilheyrandi slappleika.  Skrapp samt í smá berjamó seinnipartinn í gær og týndi smá, svona rétt út í skyrið.  Annars var nóg að gera um helgina.  Komum loksins í verk að ríða austur í dal og aftur heim daginn eftir.  Ágætis túr bara þó svo að veðrið hefði getað verið betra (það hefði líka getað verið verra)

Hafið þið annars tekið eftir því að það er að koma haust.  Allt orðið svo voðalega haustlegt, dimmt á kvöldin,  grasið farið að gulna svolítið, komin ber og þessi týpíski haustkeimur af veðrinu.  Enda er þetta allt að bresta á, kennsla, göngur o.s fr.  Mér hefur alltaf fundist haustið vera frábær árstíð. 

kveðja í bili

GEH

 

9.ágúst

Jú ég er ennþá hér og í fullu fjöri.  Greinaskrif hafa tekið mestalla mína orku síðastliðna daga.  Enn þetta er nú allt að hafast.  Merkilegt hvað svona smádútl tekur langan tíma, laga myndir, fara yfir texta, tékka hitt og þetta.  Er ekki mín sterkasta hlið en eitthvað sem þarf að gera engu að síður.  Annars hefur góða veðrið látið sjá sig aftur eftir nokkra blauta og kalda daga.  Vonum að það endist það sem eftir er sumars

yfir og út

GEH

Olei

Einmitt það, komin föstudagur og það meira að segja verslunarmannahelgarföstudagur.  Einu sinni hefði það nú verið tilefni til netts fiðrings í tánum en það hefur nú ekki gerst í nokkuð mörg ár.  Það skal þó viðurkennast að ég væri alveg til í að kíkja eitthvað út, einfaldlega vegna þess að aldrei þessu vant er eitthvað um að vera á Akureyri.  Það er blasir þó við ákveðið vandamál sem er skortur á hæfu fylgdarliði.  Auglýsi hér með eftir því

Góða og gleðilega Verslunarmannahelgi

GEH

The Invinsible

Ég kíki jafnan daglega á stjörnuspána mína svona til gamans, þær eru nú alla jafna tiltölulega diplómatískar og hægt að túlka á ýmsa vegu eftir hentugleika.  Í dag segja stjörnurnar þetta um okkur konungana

Ljón:Þér líður eins og þú gætir ekki tapað - jafnvel þótt þú myndir reyna það. Hvað ef eini möguleikinn væri að vinna? Láttu á það reyna! (mbl.is)

Ef þú finnur fyrir einhverskonar orkuleka um þessar mundir, ættir þú að huga mun betur að heilsu þinni. Spennandi tími er framundan og þú ættir að safna krafti fyrir framhaldið. Hér kemur fram að kraftur þinn mun margfaldast næstu mánuði. Heillastjarna þín skín skært yfir helgina framundan en mundu að millivegurinn er bestur (spamadur.is)

Af þessu verður ekki dregin nema ein ályktun "I m invinsible"  og það hef ég nú reyndar alltaf sagt.

Þið hin verðið bara að passa ykkur á þeim fjölmörgu ljónum sem líkleg eru til að spássera um næstu daga, uppfull af mikilmennskubrjálæði og sannfæringu um eigið ágæti

Yfir og út

 

hið opinbera

Ég er ekki búin að fá álagningarseðilinn minn.  Skyldi það vera til komið vegna þess að hið opinbera skuldi mér slíkar fúlgur fjár að þeir veigri sér við að senda mér seðilinn.  Líklega ekki.  Ég veit þó a.m.k að ég er ekki meðal hæstu greiðendur opinbera gjalda þetta árið.  A.m.k hefur nafn mitt ekki verið birt í neinum fréttamiðlum. 

Annars fannst mér nokkuð kúnstugt tiltæki hjá ungum sjálfstæðismönnum að mótmæla opinberun álagningarskánar.  Ekki mótmælin í sjálfu sér heldur taldi ég að ungir sjálfstæðismenn myndu styðja það sjálfsagða frelsi hvers mann að geta hnýsast um hagi náungans.  Hafði einhvernvegin á tilfinningunni að þeir væru á móti boðum og bönnum svona almennt og þar með töldu banni við birtingu álagningarskrár.  Það er augljóslega ekki það sama frelsi og frelsi.   Það er þó líklegast hyggilegast að viðurkenna að ég veit lítið um unga sjálfstæðismenn og fyrir hvað þeir standa.  Set alltaf smá spurningarmerki við ungt fólk í pólitík.  Persónulega er ég búin að skipta svo oft um lífsskoðun á mínum rúmlega 30 árum að ég á bágt með að trúa að fólk geti verið orðið pólitískt fastmótað fyrir tvítugt.   

En nóg um það

Yfir og út í bili

Gunnfríður (pólitískt viðrini með meiru)

Einmitt það já....

Og þá kom álagningarskráin.  Látum nú vera að hún sé látin liggja frami fyrir fólk að skoða, ef það á annað borð er mikið fyrir að hnýsast um hagi náungans.  En hver er hæstur á hinum og þessum stöðum tel ég varla stórfréttir.  Það hlýtur eitthvað ívið merkilegra og áhugaverðara að vera að gerast einhverstaðar.  Reyndar verður nú að viðurkennast að ég er haldin næstum sjúklegu áhugaleysi um annað fólk, þekki ekki til neinna fræga leikara eða kaupjöfra (þeir ku jú  vera "selebrití" Íslands).  Kannast reyndar við nokkra tónlistarmenn enda hef ég gaman af að hlusta á tónlist. 

Ég hef því ekki nokkurn einasta vott af áhuga á því að vita hver greiðir hvað í opinber gjöld.  Tel það vera meira fréttaefni í sjálfu sér, og mun áhugaverðari staðreynd, að fólk skuli standa í biðröðum til að fá að glugga í skrána.  Hvaða kikk skyldi maður nú fá út úr því???

Hreiðar Már Sigurðsson gjaldahæstur í Reykjavík