Hér kemur áríðandi tilkynning!!!!!

Svo öllu sé haldið til haga þá HAFNAég því alfarið að ég sé að breytast í "grumpy" kellingu og vísa ÖLLUMfullyrðingum um slíkt þráðbeint aftur til heimahúsanna . 

Annars sit ég hér þriðja kvöldið í röð og strita við að leita uppi kýr sem ekki eru til og finna stað fyrir kýr sem detta niður úr skýjunum.  Mér til  mikillar skelfingar, fann ég einnig sveitarfélagið Víðavang.  Þar er amk einn bær. 

Þetta var svona smá skýrsluhaldshúmor sem væntanlega enginn skilur, en mér sjálfri finnst rosalega fyndinn . 

VÁÁÁ!!!!, hvað ég er orðin leiðinlega gift vinnunni minni .

Hús gleðinar

Svona til að kóróna hin frábæra gærdag vaknaði ég klukkan tvö í nótt.  PARTÝ!!!!!! á Hlégarði,  aðfaranótt þriðjudags.  Ég hugsaði margt ljótt þar sem ég lá undir hlýrri sænginni og íhugaði hvort ég ætti að nenna að stökkva framúr til að fara fram og skammast.  Ákvað að bíða átekta, hugsanlega gæti ég sofnað aftur.  Klukkutíma seinna var gleðin ennþá í fullum gangi og menn augljóslega komnir á það sig er þeir álíta sig heimsins bestu söngmenn.  Það er líklega best að taka það fram að í nótt voru heimsins bestu söngmenn EKKI staddir á Hlégarði.  Langt því frá!!!!

Á þeim tímapunkti var ég hætt að hugsa margt ljót og farin að segja margt ljótt.  Geðvonskan varð ,að lokum, lönguninni til að kúra undir hlýrri sænginni yfirsterkari.  Ég geystist því á fætur og stormaði fram í græna náttsloppnum mínum, mjög sennilega ekki sérlega frýnileg, úfin og geðvond.  Lét nokkur vel valin orð falla í reykmettuðu eldhúsi sambýlisins.  Skellti svo á eftir mér hurðinni og strunsaði aftur inn í íbúðina mína.  Eitthvað sljákkaði í liðinu en ég var hins vegar komin í hvílíkan ham að ég sofnaði ekki fyrr en undir morgun, svaf yfir mig og mætti hálftíma of seint í vinnuna

Ég hygg því á hefndir við tækifæri

"hmmph"

Æ ég er bara eitthvað verulega illa upplögð núna seinnipartinn.  Því ætla ég að þusa aðeins hérna inni og vona að með því fái ég útrás fyrir pirringinn og allt verði gott á ný.  Held að ég sé að láta veðrið angra mig eitthvað.  Það er nú reyndar ákaflega ógáfulegt að gera það, ef maður ætlar að búa á Hvanneyri, en stundum ræður maður ekki við þetta, sérstaklega þegar boðið er upp á marga daga í röð af skítveðri þar sem jöfnum höndum fer, rigning, slydda og snjókoma.  Eini fastinn í þessari jöfnu er rokið sem aldrei lætur deigan síga, hvað sem tautar og raular.  Einhverjir myndu kannski segja að það væri þá alltént gott að geta gengið að einhverju vísu en ég er bara alls ekki í stuði fyrir svoleiðis Pollýönnuleik akkúrat núna. 

Til að kóróna allt saman, þá telur hið ágæta sveitarfélag Borgarbyggð að það sé nú tvímælalaus sóun á peningum skattborgarana, að hreinsa götur og moka snjó.  Hvað er líka skemmtilegra en að vaða snjó og krapa upp á mið læri.  Auk þess þá er maður, með þessu móti, svo miklu stöðugri á svellinu sem liggur undir krapaflóðinu og því minni líkur á að menn detti.  Fari svo ólíklega að einhverjum takist þrátt fyrir allt að detta, nú þá er lendingin alltént tiltölulega mjúk þó svo einhverjum kynni að finnast heldur kalt að baða sig í krapapollunum en það verður nú að teljast smámunasemi og hreinn og beinn aumingjaskapur.  

Já Borgarbyggð sér um þegna sína það er ekki spurning.  Þarna hafa líka verið slegnar tvær flugur í einu höggi því snjórinn og ísinn hefur samviskusamlega fyllt upp í allar holurnar sem í nokkur misseri hefur láðst að laga og því er aftur orðið fært fyrri Peugeot-inn minn niður aðkeyrsluna að nemendagörðunum.  Að vísu þarf ég að taka bílastæðið á ferðinni og muna eftir að gera ráð fyrir viðnám krapaelgsins og vindmótstöðu til að geta reikað út hæfilega hröðun miðað við þá vegalengd sem ég þarf að fleyta Peugeot-inum til að koma honum í stæði.  Fari ég of hratt næ ég ekki að beygja upp á stæðið en fari ég oft hægt er viðbúið að bíllinn stöðvist áður en að stæðinu er komið og þá er ég í vondum málum því ég á ekki vöðlur og yrði því líklega að dúsa í bílnum þar til vorar eða starfsmenn Borgarbyggðar komi til að hreinsa bílastæðið, hvort heldur sem gerist nú fyrr.

Þetta er Gunnfríður Elín Hreiðarsdóttir sem talar úr veðurparsdísinni Borgarfirði sem var, ef mér skjátlast ekki, kosin veðursælasti staður Íslands síðastliðið sumar.  Það skal þó geta þess að það voru heimamenn sjálfir sem kusu og líklega verður að gera ráð fyrir að þeir séu einfaldlega ekki vanir neinu skárra.

GEH

 

Viku seinna....

.... er komin tími á nýja færslu.  Sit hér á Eyrinni meðan enn eitt ofsaveðrið geisar úti.  Var reyndar búin að skipuleggja norðurferð og þorrablót á Hrafnagili í kvöld en að sjálfsögðu var öllu flugi frestaði í gærkveldi  og ég því veðurteppt í höfuðborginni ásamt Þorbjörgu.  Ég ákvað því að slá striki yfir þorrablótið og fara hvergi þar sem verkefnabunkinn hefur ekki minnkað að neinu ráði og taldi ég praktískari not fyrir tíman að grynnka hann í stað þess að fljúga norður í dag til þess eins að keyra til baka á morgun.  Norðurferðin bíður því betri tíma, þegar ég hef betri tíma

Leitaði á náðir Kollu varðandi húsaskjól í gærkveldi og tók hún vel í  það af sinni einstöku gestrisni og góðmennsku.  Takk fyrir það Kolla.  Skaust svo milli lægða upp á Hvanneyri í morgun. 

Vikan var annasöm enda Fræðaþing og regluleg óveður sem gerðu ferðir milli Hvanneyrar og Reykjavíkur nokkuð stór óvissufaktor.  Því varð Hótel Saga að koma til bjargar.  Það má því segja að ég hafi búið i ferðatösku frá því á þriðjudagskvöld.  Til allra guðslukku gáfu Þorbjörg og Hákon mér ágætis ferðatösku í jólagjöf sem nú þegar hefur margsannað ágæti sitt.

Góða helgi og góða skemmtun allir þeir sem ætla á þorrablót í kvöld en þeir ku vera fjölmargir

GEH

Á laugardegi

Ein stutt á laugardagsmorgni héðan af Eyrinni.  Úti er hið besta vetrarveður -13 °C og logn.  Já ég segi og skrifa LOGN!!!!!!!  Maður veit varla hvaðan á sig stendur veðrið, enda stendur það ekki á mann úr neinni átt.

Nýjustu fréttir eru þær að ég er búin að fá pláss fyrir hana Yrpu mína, betur þekkta sem Litlu Jörp, og henni til fulltingis verður Bleik, bleiki fjarðarhesturinn hans Hákonar.  Einhverra hluta vegna læðist að manni grunum um einhver norsk áhrif í íslenska hrossastofninum, þegar maður lítur þá hryssu augum. 

Það er því ekki laust við að nokkrar tilhlökkunar gæti vegna fyrirsjáanlegra útreiðatúra, sérstaklega þegar Eyrin býður upp á svona frábært útreiðaveður eins og í dag.

Annars stendur nú yfir stórhreingerning á Hvanneyrargötunni enda ekki vanþörf á eftir útlegð og vinnutörn síðustu viku.

Læt fylgja hérna eins og eina mynd frá Noregi.  Þar var alltaf LOGN og aldeilis frábært útreiðaveður

Þar til síðar

GEH

The simple life

Ég var sest hérna í góðum húmör eftir rauðvínsdrykkju með Elsu, staðráðin í að skrifa eitthvað ódauðlegt.  Ein eins og allir góðir artistar kannast við þá yfirgefur skáldagyðjan þá oft þegar minnst varir.  Ég er hins vegar ennþá í góðum húmör, búin að tryggja mér miða á Þorrablót og sé ástæðu til þess að deila því með ykkur, hvort sem ykkur líkar betur eða verr.  Það er meira að segja mögulegt að það verði skemmtilegt Þorrablót sem ég fer á þetta árið. 

Ég er nú samt að hugsa um að auglýsa eftir skemmtunum okkur Elsu til handa.  Hvanneyri er ekki mest lifandi staðurinn.  Höfum gert tvær heiðarlegar tilraunir til að fara á barinn.  Í annað skiptið voru þar fyrir 5 einstaklingar og í hitt skiptið 3 .  Okkur er sárlega farið að langa á almennilegt skrall.  Einhver púki farin að láta kræla á sér  

Annars nálgast helgin eins og óð fluga og spurning hvort við gerum eina tilraun enn við barinn.  Dagskrá helgarinnar er reyndar að verða umtalsvert löng því ásamt stórum pappírshrúgum sem bíða við tölvuna verður að viðurkennast að bæði ég og íbúðin eru komin yfir eindaga hvað varðar þrif (íbúðin) og "personal grooming" (ég).  Það er því líklegt að gólftuskan verði tekin til handagangs og látið renna í gott freyðibað eftir að íbúðin hefur fengið yfirhalningu.  Leggjast í bleyti við kertaljós og með eitthvað gott í glasi, skríða svo upp í tandurhreint og ný-umskipt rúm.  Svona geta einfaldir hlutir gefið lífinu gildi . 

Góða nótt af eyrinni

GEH

Svellkaldur

Mér skilst að á landinu geysi óveður.  Merkilegt nokk þá varð ég ekki vör við neitt óveður á leið minni í borg óttans í morgun, smá kóf svona á stöku stað.  Fanski skiptineminn tók þó myndir í gríð og erg út um framrúðuna.  Ég dáist að þrautseigju mannsins sem alltaf fer á fætur á morgnana og út á hringtorg í þeirri von að einhver komi og taki hann upp í .  Sem og ég gerði, gat ekki látið manngreyið húka þarna í fjúkinu, þó ég væri nú meira stemmd til að vera ein með sjálfri mér og syngja hástöfum með útvarpinu .   Veit ekki alveg hverjum datt í hug að það væri góð hugmynd að staðsetja skiptinema, sem sæktir tíma í HÍ, á Hvanneyri .  En hvað veit ég svo sem.  Kannski flokkast þetta sem partur af upplifuninni. 

Ísland best í heimi!!!!

Reyndar komst ég að því að Norðmenn eru allmennt haldnir þeim ranghugmyndum að Noregur sé best í heimi. 

Hafa þeir aldrei séð Thule auglýsingarnar????

yfir og út úr Höllinni

GEH

P.S púkinn vill ekki kannast við orðið "nokk" en býður mér meðal annars upp á valkostinn fokk í staðinn, er allt á leið til andskotans eða hvað

 

 

Heitur sýrður rjómi .... nammi namm

Jæja jæja, líklega er komin tími á ýtarlegri færslu eftir nokkurra daga hlé.   Það er kannski best að byrja á því að svara nokkrum spurningum: 

Já Kolla ég fór og verslaði!!!!!! Löngunin til þess að vera sæmilega til fara varð verslunarfóbíunni yfirsterkari og með dyggilegri aðstoð Ingunnar sem vissi hvar átti að finna alla skapaða hluti tókst mér að kaupa það sem mig vantaði á mettíma.  Ég held að á einhverjum tímapunkti fái ég mér svona "personal shopper" en þangað til ég hef efni á því verð ég að ganga í verkið sjálf eins og hvert annað skítverk.  Þetta þýðir það hins vegar að nú þarf ég líklega ekkert að versla í nokkuð langan tíma og geymi líklega alla verslun þangað til að við Fanney förum til LONDON!!!!

Nú hvað flensuna varðar þá getið þið andað léttar, ég virðist vera að vinna þann slag.  Tel alllíklegt að umtalsverð reynsla mín í samskiptum við hrokafullan karlpening og aðra óværu, hafi komið þar að góðum notum. 

Nú annars þá var Noregsferðin góð eins og áður sagði.  Fullt af kúm, heimsóknum á ýmsa staði, góðum mat og víni.  Góði maturinn var þó ekki norskur en hin hefðbundni norski matur sem boðið var upp á var langt frá því að vera nokkuð góður.  Rommegröd og lefsur eða með öðrum orðum, heitur sýrður rjómi og flatbrauð með smjörlíki og kanilsykri.  Delish...... eða hvað.

Hreindýrakjötið var þó frábært. 

En þar sem andleysið hrjáir mig um þessar mundir og ég sé fram á að þessi færsla er að verða ein sú allra leiðinlegasta sem boðið hefur verið upp á hér í háa herrans tíð.  Því held ég að ég láti þessu lokið að sinni svo færslan varð ekki eins ýtarleg og áætlað var í upphafi.  Hugsanlega kemur andinn yfir mig einn af þessum dögum.

Þar til síðar

GEH

Þetta er ein af þessum færslum sem ég nenni ekki að upphugsa góða fyrirsögn á.

Jæja þá er maður komin aftur eftir langan og strangan túr.  Punkturinn var settur yfir i-ið þegar þurfti tvær tilraunir til að lenda í Keflavík.  Helv#&&## rokrassgat alltaf hreint.  Ferðasagan kemur síðar ef ég dett í gírinn en það verður nú að segjast að eftir 4 daga af umræðum um nautgripi og pólitík var ekki laust við að að mér væri farið að sækja örlítið eirðarleysi og löngun til að tala um eitthvað annað, næstum því hvað sem er annað.  

Átti góða daga hjá mæðgunum í Oslo.  Ingunn gerðist shopping/tour guide og við Sigga kíktum út á lífið.  Kærar þakkir fyrir skemmtilega helgi mæðgur. 

Annars er kvefið svona heldur á undanhaldi.  Held ég geri aðra tilraun með kjúklingasúpuna í kvöld.   

Vel vopnum búin

Ég fór í verslunarleiðangur í Borgarnes, nú skyldi sko reka út óværuna.  Leiðin lá fyrst í Bónus þar sem sítróna, hunang, chilli, hvítlaukur, kjúklingur og te var tínt í körfu.   Næst var það apotekið þar sem viský-röddin bað um verkjatöflur, hálstöflur, hóstasaft og nefúða, eða allan pakkann eins og afgreiðslukonan sagði.  Að lokum var Ríkið tæklað þar sem fleygur af viský ásamt einhverju smáræði öðru var sett í poka.  Nú verður þetta helvíti tæklað með öllum mögulegum ráðum.   Leið strax betur bara eftir að vera búin að kaupa inn vopnin.  Á nú fullbúið vopnabúr.  Nú mallar kjúklingasúpa a la Valur á hellunni og ég komin með hunangs og viský-blandað te í glas meðan ég bíð.

 

Yfir og út

General Gunnfríður